UFC чемпионы Ислам Махачевтің жаттықтырушысы Хавьер Мендес австралиялық Джек Делла Маддаленаның америкалық Белал Мұхаммедке қарсы жеңісіне пікір білдірді.
«Джек өз ойынын жүргізді, ал Белал олай істемеді немесе соны қаламады. Нақты айту қиын… Белалдан партерге алып жығу әрекеттерін көп көрмедім. Мүмкіндіктер болды. Бәлкім, стойкада (тұрып соғыста) белгілі бір табысқа жеткен соң, сол жолмен жалғастырғысы келген шығар, білмеймін… Белал оған тиісінше қысым көрсетпеді. Десе де, бәлкім, Джек оған мұны істеуге мүмкіндік бермеген де шығар.
Джек керемет жұмыс атқарды. Ол қолмен және аяқпен соққыларды жақсы үйлестірді, көп уақыт бойы қашықтықты сақтай білді… Иә, ол әмбебап файтер, өте, өте мықты», – деді Мендес Submission Radio-ға берген сұхбатында.