Бірінші орта салмақта өнер көрсететін қазақстандық боксшы Садриддин Ахмедовтың (15-0, 13 КО) жаттықтырушысы Абель Санчес шәкіртінің мексикалық боксшы Элиас Эспадаспен (23-6, 16 КО) алдағы жекпе-жегіне дайындығы туралы айтты, деп хабарлайды kingring.kz порталы Sports.kz сайтына сілтеме жасап.
Ахмедов пен Эспадас 19 сәуірде АҚШ-тың Калифорния штатындағы Коммерс қаласында өтетін бокс кешінің басты жекпе-жегінде кездеседі. Қазақстан уақыты бойынша бұл жекпе-жек 20 сәуір күні таңертең өтеді.
— Бұл ауыр жекпе-жек болады. Бірақ Садриддин тынбай жаттығып жатыр және бірнеше ауыр сппаринг өткізді. Бұл жекпе-жек оны әлем чемпионы атағына жақындататын тағы бір қадам болады деп үміттенемін. Мені қарсыластың дайындығы алаңдатпайды. Маңыздысы — менің боксшымның дайындығы. Қарсылас ретінде кімді қойса да бәрібір. Біз ешкімге бейімделмейміз, керісінше, олар бізге бейімделсін, — деді Санчес жекпе-жек алдында.